भुटानी शरणार्थी शिविर, शनिश्चरेमा शंकास्पद रुपमा साग वेचिरहेको अवस्थामा एकजना चोर पक्राउ परेको छ । साइकलको क्यारियरको दुवैपट्टि चामलको बोरामा साग बोकी शिविरका छाप्रा छाप्रामा बेच्दै हिंडिरहेको अवस्थामा उक्त चोर पक्राउ परेको हो । सोही शिविरको सेक्टर के ३, छाप्रो नं. ३२ को रुद्र बहादुर गुरुङ साग चोरीको अभियोगमा पक्राउ परेको हो ।
साग चोरी भएको थाहा भएपछि सागको खोजी गर्दै शिविरस्थित बाङ्गे बजारतर्फ जाँदै गर्दा बाटोमै सागसहित उक्त चोर फेला परेको सागधनी सोही शिविरको सेक्टर एल ४, छाप्रा नं. ५ का गडुलध्वोज कार्कीले बताए । तेश्रो मुलुक स्तान्तरण भएका परिवारको घडेरी र आफ्नै घर आँगनमा उमारेको साग एक छाक पनि खान नपाई कलिलो छँदै चोरी भएको गुनासो गरेका छन् कार्कीले ।
त्यसैगरि सोही सेक्टरका डिल्लीराम बस्नेत, भिम कुमार सार्की लगायत सात-आठ घरको पनि साग चोरी भएको सेक्टर एल का प्रमुख शिवलाल रिमालको दावी छ । उनका अनुसार करिव एक क्वीन्टल जति साग चोरी भएको छ ।
साग चोर रुद्र बहादुर गुरुङलाई शिविर निगरानी टोली (क्याम्प वाच टिम) मा सोधपुछका लागि राखिएको छ भने साग चोरीमा संलग्न अन्य चोरहरु फरार रहेको र थप अनुसन्धान जारी रहेको टोलीका संयोजक दल बहादुर गुरुङले जानकारी दिएका छन् ।
लाक्पा
No comments:
Post a Comment