२० हजार नाघे

बिस हजार भन्दा धेरै भुटानी शरणार्थी तेस्रो मुलुक पुनर्वासमा गएका छन् ।
भूटानबाट लखेटिएर नेपाल आएका शरणार्थीहरू पुनर्बासको सिलसिलामा नेपालस्थित शिविरबाट विभिन्न तेस्रो मुलुक पुगेका हुन् ।
शरणार्थी मामिला सम्बन्धि संयुक्त राष्ट्रसंघीय उच्चयोग (यूएनएचसीआर) र अन्तर्राष्ट्रिय आप्रवासी सङ्गठन (आइओएम) ले विस हजार भन्दा धेरै भुटानी शरणार्थी अमेरिका सहित विभिन्न सात मुलुकमा पुनर्वास गर्राईएको आज संयुक्त प्रेस विज्ञप्ती प्रकासित गरि घोषणा गरेका हुन् ।
नोभेम्बर २००७ मा पुनर्बास शुरू भएदेखि हालसम्म संयुक्त राज्य अमेरिकाले सबभन्दा बढी १७ हजार ६सय १२ शरणार्थीहरू पुनर्बास गराएको छ । जसमध्ये धेरैजसो टेक्सास, न्यूयोर्क, जर्जिया, एरिजोना, पेन्सभेनिया र क्यालिफोर्नियामा पुनर्बास भएका छन् ।
अस्ट्रेलियामा ८ सय ४६, क्यानडामा ६ सय ७४, नर्वेमा २ सय ९९, न्यूजिल्याण्डमा २ सय ९४, डेनमार्कमा १ सय ७२ र नेदरल्याण्ड १ सय २२ जना पुनर्स्थापित भएको आयोगले जनाएको छ ।
शरणार्थीहरूलाई नयाँ देशमा नयाँ जीवन शुरू गर्न उदारतापूर्वक मौका प्रदान गर्ने मुलुकप्रति आभार व्यक्त गर्दै नेपालस्थित यूएनएचसीआरकी कायम मुकायम प्रतिनिधि डायन गुडम्यानले अवसर रोज्न शरणार्थीहरु स्वतन्त्र रहेको जनाउनु भएको छ ।
प्रत्येक महिना दुइ हजार शरणार्थीहरूको प्रस्थान यात्रालाई सहजीकरण गर्न आइओएमले भौतिक संरचना स्थापना गर्नुका साथै दक्ष जनशक्ति तयार गरेको र यस वर्षको अन्त्यसम्ममा २५ हजारभन्दा बढी शरणार्थीहरू पुनर्बासका लागि लगिने अपेक्षा रहेको आइओएमको नेपालस्थित मिसन प्रमुख सरत दासले बताउनु भएको छ । पुनर्वासमा जान ७८ हजार भन्दा धेरै शरणार्थीले इच्छा व्यक्त गरेका छन् ।