शिविरमा पत्रकारको सुरक्षाबारे गम्भीर चासो

शरणार्थी शिविरभित्र आजकल पत्रकारहरु असुरक्षित हुँदै गएको कुराप्रति हाल अमेरिकामा रहेका Third World Media Network Bhutan Chapter का अध्यक्ष टीपी मिश्रले सम्वन्धित पक्षको गम्भीर ध्यानाकर्षण गराएका छन् ।तितोपिरोमिठो डट कम सँगको विशेष कुराकानीमा मिश्रले पछिल्लोपटक सन्देश साप्ताहिक का पूर्व प्रधान सम्पादक भक्त घिमिरेलाई शिविर छोड्न ड्रुक लियोपर्डले दिएको चेतावनी आफैंमा आपत्तिजनक रहेको बताएका छन् ।घिमिरे मात्र नभई अरु पनि निर्वासनमा रहेका पत्रकारहरु असुरक्षित बनेको कुरा आफूलाई बारम्वार जानकारी आइरहेकोले सम्वन्धित पक्षलाई पत्रकारको सूचनाको हक सम्वन्धीको काममा वाधा नल्याइदिन मिश्रले आग्रह गरेका छन् ।“हाम्रा केही पत्रकार साथीहरुले आफूहरु शिविरबाट समाचार संकलन गर्न नसक्ने जानकारी दिएका छन् ।” मिश्रले भनेका छन् – “यो अत्यन्तै गम्भीर कुरा हो ।”मिश्रका अनुसार शिविरमा देखिएको मतभिन्नताका कारण पत्रकारहरु चपेटामा परेका छन् । “हतियारको धारमा खुट्टा राखेर समाचार संकलन गर्न वाध्य छन् पत्रकार साथीहरु ।” मिश्रले थप भनेका छन् । उनका अनुसार – “यहि स्थिति आइरहने हो भने जनताको सूचना पाउने अधिकार पूरै कुण्ठित हुनेछ ।”
भूटानमा प्रेस स्वतन्त्रताको वकालत गर्दै निर्वासनमा करिव १०० को संख्यामा पत्रकारहरु काम गरिरहेको समेत मिश्रले जानकारी दिएका छन् ।निर्वासनमा रहेका भुटानी पत्रकारहरुलाई समाचार संकलनका लागि सुरक्षित वातावरण निर्माण गर्नमा सहयोग पुर्याइदिन नेपाल पत्रकार महासंघ, अन्तर्राष्ट्रिय पत्रकार महासंघ लगायत सम्वन्धित सवै पक्षलाई मिश्रले निवेदन समेत गरेका छन् ।पत्रकारको सुरक्षाबारे मिश्रले आफनो व्लग मा विगत चार दिनदेखि निरन्तर लेख प्रकाशित गरिरहेको अवस्थामा तितोपिरोमिठोले उनीसँग सम्पर्क गरेको थियो ।‘Becoming a journalist in exile’ का लेखक/सम्पादक समेत रहेका मिश्र शिविरमा अहिले पनि सञ्चालित एकमात्र अंग्रेजी पत्रिका The Bhutan Reporter मासिकका प्रकाशक तथा प्रधान सम्पादक समेत हुन् ।

(तितोपिरोमिठो डट कम)