खाद्यको गुणस्तर खस्कँदै

राष्ट्रसंघिय बिश्व खाद्य कार्यक्रमले भुटानी शरणार्थीलाई दिइरहेको खाद्यको गुणस्तर खस्कँदै गएको गुनासो आइरहँदा बिश्व खाद्य कार्यक्रमको रोम स्थित कार्यालयका गुणस्तर अधिकारी शरणार्थी शिविर आइपुगेका छन् ।इटलीको राजधानी रोमस्थित बिश्व खाद्य कार्यक्रमको मुख्यालयका बर्टनार्ड नामका ती गुण्स्तर अधिकारीले अस्ति बुधबार मोरङको शनिश्चरेस्थित भुटानी शरणार्थी शिविरपुगी त्यहाँ बितरित खाद्यको २० वटा नमुना संकलन गरेका छन् ।स्रोतहरुका अनुसार उक्त शिविरमा गएको असार महिनामा अखाद्य खेसरी मिसाइएको चना बितरण गरिएको थियो ।ती अधिकारीले संकलन गरेको खाद्य सामग्रीको नमुनाको ब्याकटेरिया समेत परीक्षण गरिने बताइएको छ ।तर खाद्य सामग्रीका गुणस्तर अधिकारी अनुगमनका लागि आउने खबर पहिले नै स्थानीय तहसम्म थाहा भइसकेको हुँदा गुणस्तर खस्किएको वास्तविक तथ्य ढाकछोप हुनसक्ने शरणार्थीको भनाइ छ ।