भाइको पिटाइबाट दाइको मृत्यु

भूटानी शरणार्थी शिविर शनिश्चरेमा आफ्नै भाइको पिटाईबाट एकजनाको मृत्यु भएको छ ।
२२ बर्षीय विर्खबाहादुर तामाङ्गले शुक्रबारका दिन ठिक ४ बजे परिवारिक झै-झगडाको निहुँमा ३५ बर्षीय धनबीर तामाङ्गमाथि धारीलो बासँले शरिरमा जथाभावि कुटपिट गरेपछि शिविरको प्राथमिक स्वास्थ्य चौकीमा उपचार नहुने भएपछि उनलाई पथरीस्थित नसिर्ङ होममा लगिए पनि टाउकामा गहिरो चोट लागेकाले नर्सिङ होममा उपचार नहुने भएपछि तामाङलाई कोशी अञ्चल अस्पताल विराटनगर र त्यसपछि धरानसम्म पुर्‍याएको पारिवारिक स्रोतले जनाएको छ ।
टाउकोमा लागेको गहिरो चोटको थप जाँच र उपचार गर्न खर्चको अभावका कारण धरानको घोपा अस्पातलमा हुन नसकेकाले डाक्टरको सल्लाह अनुसार परिवारले उनलाई सेक्टर आई/१, छाप्रा नं. २७ मा ल्याएपछि आइतबारको दिन मृत्यु भएको क्याम्प ब्यावस्थापन समितिले जानकारी दिएको छ ।
विर्खबाहादुर तामाङ्गलाई घटनापछि शनिश्चरे सशस्त्र प्रहरी बलका सइ नरबहादुर बरुवालले मोरङ्गको उर्लाबारी प्रहरी चौकीमा बुझाएका थिए । प्रहरीका अनुसार तामाङ्गले मादक पर्दाथ सेवन गरी दाइमाथि जथाभावी कुटपिट गरि हत्या गरेको हो ।
तामाङ्गको सोमबार पथरी जङ्गलमा दाहसंस्कार गरिएको शनिश्चरेस्थित पत्रकार लाक्पा तामाङ्गले जानकारी गराएका छन् । साथै उनले शिविरमा सुरक्षा ब्यवस्था कडा पारिएको पनि बताएका छन् ।
त्यसैगरि टिमाई शिविरमा पनि क्याम्प सुरक्षा समितिका सदस्यको कुटाईबाट एक जना शरणार्थी घाइते बनेका छन् ।
रातीको समयमा शिविरभित्र घुमफिर गरिरहेको वस्थामा समितिले सोधपुछ गर्दा कुनै पनि उत्तर नदिएपछि टिमाई सेक्टर डि/१ छाप्रा नं. ४ का भिम अधिकारीलाइ समितिका केही सदस्यहरूले कुटपिट गरेका थिए । उनको शरीरको टाउको, दाँत र अन्य भागमा गम्भीर चोट लागेको बालमञ्च संयोजक चन्द्र पराजुलीले बताएका छन् । उक्त घटना सम्बन्धमा उनका परिवारले शुक्रकार दमक स्थित यूएनएचसीआर कार्यालयमा घटनाको थप अनुसन्धान गरी दोषीउपर कारवाही तथा शिविरमा थप सुरक्षाको माँग राखेको पनि पराजुलीले बताएका छन् । अधिकारीको उपचार भइरहेको जानकारीमा आएको छ ।
एक समाजसेवी तथा अगुवाको हत्या र केही अगुवाहरूलाइ दिइएको धम्किपछि सातै शिविरमा सुरक्षा कडा पारिएको छ । साँझ ७ बजेदेखि शिविरभित्र कुनै पनि आधिकारीक काम विना हिंडडुल गर्न मनाई गरिएको छ ।