“चितुवा”ले भौतिक आक्रमण गर्ने चेतावनी

भर्खरै गठन भएको भनिएको “ड्रुक चितुवा” नामक एक समूहले आठ भूटानी शरणार्थीहरूलाइ भौतिक आक्रमण गर्ने चेतावनी दिएको छ । पहिलोपल्ट नाम सुनिएको समूहले वेलडाँगीका ३ वटै शिविरका सार्वजनिक ठाउँहरूमा आज विहान चेतावनीसहितका पम्पप्लेट टाँसेका छन् ।चेतावनी दिइएका शरणार्थीहरूलाई परिवारसहित जतिसक्दो चाँडो शिविर छाड्न या त शारिरीक आक्रमणको सामना गर्न पनि ती पम्पप्लेटमा उल्लेख गरिएको छ । “चितुवा”ले ती शरणार्थीहरूलाइ पहिले स्वदेश फिर्तीको कुरा उछाल्ने र अहिले आएर धमाधम आफ्ना नातेदार र परिवारका सदस्यलाइ तेश्रो देश पठाइरहेको पनि आरोप लगाएको छ ।
चेतावनी दिइएका शरणार्थीहरूमा टी.वी.थापा र गोपाल गुरूङ (भूटान पिपुल्स पार्टीसँग सम्वन्धित), डि.आर. कट्टेल (भुटान गोर्खा राष्ट्रिय मुक्ति मोर्चा), सुवास आचार्य (बेलडाँगी – २ विस्तारितका पूर्व सचिव), भक्त घिमिरे (सन्देश साप्ताहिकका पूर्व प्रमुख सम्पादक), प्रताप सुव्वा (शनिश्चरे शिविरका पूर्व सचिव), नारदमुनि सन्यासी (वेलडाँगी – २ का पूर्व सचिव) र आइ.वी. खड्का रहेका छन् ।चेतावनी दिएकामध्ये कट्टेल अहिले आइ ओ एम ट्रान्जिस केन्द्र काठमाण्डमा रहेका छन् केहि दिनमा अमेरिकाका लागि उड्नेछन् ।छेप्यास्त्रको नाममा हस्ताक्षर गर्नेको पद ड्रुक चितुवाको क्षेत्रीय संयोजक लेखिएका ती पम्प्लेटहरू सादा कम्प्युटर पेपरमा भएकोले यो समूह अस्तित्वमा छ नै भनेर विश्वास गर्ने आधार चाहिँ देखिँदैन ।गत सेप्टेम्वर ८ का दिन समाजसेवी के वी खड्काको हत्या भएकोमा अहिलेसम्म कुनै पनि व्यक्ति वा समूहले जिम्मेवारी नलिएको अवस्थामा यो प्रकरण थप रहस्यपूर्ण बनेको छ ।